An de Proporzgemengen läit d’Besetze vun de Lëschten an der Hand vun de Parteien an déi sinn äerdeg um telefonéieren an nofroen. D’Gemengewahlen zu Iechternach verspriechen elo scho spannend ze ginn. An der Abteistad war laang de fréiere Minister Fernand Boden fir eng Plaz op der CSV Lëscht am Gespréich, selwecht wéi säin Adversaire vun der LSAP den Jos Scheuer. Elo schéngt dat awer vum Dësch ze sinn.

„Wann hie matgeet, sinn och derbäi“ huet et laang op béid Säite geheescht. Elo ass d’Kaz aus dem Sak, den Fernand Boden sot am Gespréich mat RTL, hien hätt „net Wëlles“ mat an d’Gemengewahlen ze goen. De fréieren Député-Maire vun der LSAP Jos Scheuer huet déi nämmlecht Informatiounen.

Et wier am Interêt vun deenen Zwee, datt dës Decisioun gefall ass. No 25 Joer Gemengepolitik géif et fir de Jos Scheuer och duergoen an et wier Zäit fir Plaz fir déi Jonk bei der LSAP ze maachen. Wien dann elo amplaz kënnt, ass nach net sécher.

Sécher ass, datt dem Jos Scheuer säi Fils, den LSAP Deputéierte Ben Scheuer, Tête de liste ass. Déi Lëscht ass nach net komplett, confirméiert ass awer, dass d’Gemengeréit Jean-Claude Strasser an Danièle Heim nees derbäi sinn. De Georges Birgen net, dofir awer héchstwahrscheinlech de Fils, Luc Birgen.

Bei der CSV ass d’Lëscht och net ganz komplett, déi aktuell Schäffen a Gemengeréit hunn awer Wëlles matzegoen: Edmond Neu, Yves Wengler, den aktuelle Buergermeeschter Theo Thiry an och den Marc Diederich, deem am Ufank vun der Legislatur um Buergermeeschteschstull souz.

Bei der DP soll et eng jonk Lëscht ginn, och wann zwee Jonker, den Steve Wagner an de Gilles Petry aus professionelle Grënn net méi derbäi sinn. De Sektiounspresident Jean-Paul Spartz geet awer mat, selwecht wéi d’Schäffen André Hartmann, Francis Reuter an de Conseiller Marcel Heinen. Fir d’éischte Kéier op der DP Lëscht wier nach de Georges Hoscheid.

Dann, Déi Gréng, déi fir d’éischte Kéier eng Lëscht zu Iechternach maachen. D’Spëtzt ass hei am Prinzip wéi déi vum Bezierk a paritéitesch besat: Raymond Becker a Carole Dieschbourg. Et gesäit, dann och duerno aus, wéi wann déi fréier Deputéiert Francoise Kuffer net géif mat an d’Gemengewahle goen. Definitiv décidéiert wier awer nach näischt.

Source : www.rtl.lu

Raymond Becker nous fait part de ses vues et de ses visions :

http://www.raymondbecker.lu/2010/08/interview-du-lundi-le-quotidien/

Virun de Wahlen ass no de Wahlen: dee nächsten groussen Stéchdag ass am Oktober 2011, mat de Gemengewahlen zu Lëtzebuerg.

An zu Iechternach, bei der LSAP hunn déi Wahlen elo schon derfir gesuergt, datt 2 prominent Memberen hir Parteikaart ofginn hunn.

De fréieren Generalsecretär vun de Sozialisten, de Raymond Becker a seng Fra, die fréier Députéiert Françoise Kuffer sinn aus der LSAP ausgetrueden.

Schonn am Januar huet d’Koppel Becker-Kuffer der LSAP offiziell de Réck gedréit, awer réischt elo, no de Chamberwahlen ass dat duerchgesickert.

De Raymond Becker, ganz activen President vun der asbl Intra Muros begrënnt seng Decisioun domatt, datt hien bei de Gemengewahlen zu Iechternach mat an d’Course wëll goen, d’LSAP hien awer net als Kandidat well mat huelen.

D’Parteispëtzt huet eng aner Versioun vun der Geschicht: D’LSAP huet ni decidéiert, den Iechternacher net mat an déi nächst Gemengewahlen ze huelen – dat seet de Parteipresident.
D’Demissioun vum Raymond Becker geet op de Januar zeréck, sou den LSAP-Chef Alex Bodry – a si hat net direkt eppes matt de Gemengewahlen ze dinn. Deemols ass decidéiert ginn, d’Kandidatur vum Ben Scheuer zeréckzebehalen, et ass awer näischt iwert d’Kandidature fir d’Gemengewahle gesot ginn. De Raymond Becker hätt doraus d’Conclusioun gezunn, dat hien och net op der Lëscht vun der LSAP fir d’Gemengewahlen erwënscht ass – esou eng Decisioun ass aawer ni geholl ginn, sou den Parteipresident Alex Bodry.

D’Françoise Kuffer, déi jo schonn 1993 aus der LSAP eraus an no e puer Méint erem era goung, huet mat der aktiver Politik ofgeschloss.

De Raymond Becker par conter ka sech virstellen, mat enger eegener neier Lëscht an d’Wahlen zu Iechternach ze goen.

Bei eng aner Partei ze wiesselen, ass den Ament jiddefalls, fir de Raymond Becker keng Optioun.

Den Mëttwochowend reagéiert d’Sektioun vun Iechternach a mengt: d’LSAP verléiert zwar elo zwee Memberen, awer keng zwee Mataarbechter.

Schonn am Januar hätt d’Sektioun e Bréif un de Parteipresident geschriwwen, an deem festgehalen gouf, datt déi zwou Persounen bannent 10 Joer op kenger eenzeger Versammlung vun de Memberen derbäi wor; an nawell wären si gefrot ginn, fir déi lescht Gemengewalen ze kandidéieren; déi zwee hätten awer d’Zesummenaarbecht mat der Partei refuséiert.

Weder den Här Becker nach d’Madame Kuffer hätten eng Demande agereecht, fir d’Parlamentswalen vum 7. Juni kënnen derbäi ze sinn; si hätten och keng Demande an deem Sënn fir déi nächst Gemengewalen gemaach.

Source : http://wahlen.rtl.lu/news/aktualiteiten/28722.html