An de Proporzgemengen läit d’Besetze vun de Lëschten an der Hand vun de Parteien an déi sinn äerdeg um telefonéieren an nofroen. D’Gemengewahlen zu Iechternach verspriechen elo scho spannend ze ginn. An der Abteistad war laang de fréiere Minister Fernand Boden fir eng Plaz op der CSV Lëscht am Gespréich, selwecht wéi säin Adversaire vun der LSAP den Jos Scheuer. Elo schéngt dat awer vum Dësch ze sinn.

„Wann hie matgeet, sinn och derbäi“ huet et laang op béid Säite geheescht. Elo ass d’Kaz aus dem Sak, den Fernand Boden sot am Gespréich mat RTL, hien hätt „net Wëlles“ mat an d’Gemengewahlen ze goen. De fréieren Député-Maire vun der LSAP Jos Scheuer huet déi nämmlecht Informatiounen.

Et wier am Interêt vun deenen Zwee, datt dës Decisioun gefall ass. No 25 Joer Gemengepolitik géif et fir de Jos Scheuer och duergoen an et wier Zäit fir Plaz fir déi Jonk bei der LSAP ze maachen. Wien dann elo amplaz kënnt, ass nach net sécher.

Sécher ass, datt dem Jos Scheuer säi Fils, den LSAP Deputéierte Ben Scheuer, Tête de liste ass. Déi Lëscht ass nach net komplett, confirméiert ass awer, dass d’Gemengeréit Jean-Claude Strasser an Danièle Heim nees derbäi sinn. De Georges Birgen net, dofir awer héchstwahrscheinlech de Fils, Luc Birgen.

Bei der CSV ass d’Lëscht och net ganz komplett, déi aktuell Schäffen a Gemengeréit hunn awer Wëlles matzegoen: Edmond Neu, Yves Wengler, den aktuelle Buergermeeschter Theo Thiry an och den Marc Diederich, deem am Ufank vun der Legislatur um Buergermeeschteschstull souz.

Bei der DP soll et eng jonk Lëscht ginn, och wann zwee Jonker, den Steve Wagner an de Gilles Petry aus professionelle Grënn net méi derbäi sinn. De Sektiounspresident Jean-Paul Spartz geet awer mat, selwecht wéi d’Schäffen André Hartmann, Francis Reuter an de Conseiller Marcel Heinen. Fir d’éischte Kéier op der DP Lëscht wier nach de Georges Hoscheid.

Dann, Déi Gréng, déi fir d’éischte Kéier eng Lëscht zu Iechternach maachen. D’Spëtzt ass hei am Prinzip wéi déi vum Bezierk a paritéitesch besat: Raymond Becker a Carole Dieschbourg. Et gesäit, dann och duerno aus, wéi wann déi fréier Deputéiert Francoise Kuffer net géif mat an d’Gemengewahle goen. Definitiv décidéiert wier awer nach näischt.

Source : www.rtl.lu

Mee wéi wier et dann zu Lëtzebuerg, wann dem Premier seng Propose Realitéit géif ginn?

Dozou e puer Iwwerleeunge vum Pierre Reyland.

Komesch eigentlech, dass de Jean Claude Juncker mat der Idee vum gratis ëffentlechen Transport koum, nodeems en dëser Deeg 23 Stonne laang am Bus souz, well wéint däer onglaublecher Vulkanäschewollek kee Fliger méi goung,  a no där Busodyssée sot: „Et ass eng Experienz, déi ech net wëll widderhuelen”. Woubäi de Vulkan an Island, oder dee vill méi décken dernierft, all Zäit nees ausbrieche kann, an dann hu mer nees ganz aner Problemer…Mee bon, ech komme vum Sujet of…

Huele mer also un: Den ëffentlechen Transport gouf gratis zu Lëtzebuerg. Domatt kéim d’Ländche endlech mol nees d’international Schlagzeilen. Net wéint dem Bankgeheimnis, oder well de Grand Duc e Gesetz net wollt ënnerschreiwen. Mee wäll grad de Grand Duché – wou et déi meeschten Autoe pro Kapp gëtt (ëm déi 630 pro 1000 Awunner) – als éischt Land op der Welt, e flächendeckenden, gratis ëffentlechen Transport ageféiert huet.

Touristen a Leit, déi aus dem Ausland op Besuch kommen, si begeeschtert, Lëtzebuerg gëtt als Beispill zitéiert. An ëmmer méi Leit klammen tatsächlech ëm op Bus an Zuch. Si spuere Benzin- an Dieselkäschten, d’Regierung spuert CO2 Emissiounen, d’Liewensqualitéit, besonnesch an de Stied, gëtt besser. A wéint der héijer Demande ginn d’Servicer an Infrastrukture och verbessert, op den Haapstrosse kommen endlech iwwerall Busspuren, och an den ofgeleeënen Uertschaften – also praktesch iwwerall zu Lëtzebuerg – komme nei Buslinnen, an t’gëtt investéiert – nei Busarrêten, nei Schinnen, nei Garen, nei Campagnën… Bus- an Zuch-fuere gëtt richteg cool, do gesäit ee Leit, wou ee gemengt hat, déi géif et zu Lëtzebuerg guer net ginn (dat sinn déi, déi och elo schon den ëffentlechen Transport huelen – de Gros dovunner Auslänner), an heiando kënnt esou guer de Gedanken, op een deen zweete Famillen-Auto net vläicht awer sollt verkafen. Well déi al Excusen – „bei mir fiert kee Bus oder Zuch, dat dauert ze laang, ech muss mäi Kand an d’Crêche siche goen, ech muss nach an de Supermarché“, etc.. – gräife net méi richteg. Well d’Leit zu Lëtzebuerg verstan hun: den ëffentlechen Transport ass keen Thema méi, mee eng Selbstverständlechkeet.

Mee elo mol lues….well esou einfach geet dat net.

Well ouni déi néideg Investitiounen ass de gratis ëffentlechen Transport just eng léif Idee – eng Mogelpackung, wéi d’Gewerkschafte soen, oder Déi Gréng. Well e Bus oder Zuch, deen et guer net gëtt, kann een jo net huelen – och wann e gratis ass. An do ass et dann erëm extreem komesch, dass de Premier de gratis effentlechen Transport proposéiert, an d’Regierung, zuer gläicher Zäit, an hire Spuerproposen, massiv Kierzungen an den Investitiounen an deem Secteur virgesäit…..

Den zweete Problem ass méi allgemeng: De Lëtzebuerger a Lëtzebuergerinnen hir Käpp – oder „d’Mobilitéitsverhalen“, wéi dat am Jargon heescht. Dat Verhalen hänkt net nëmme vun den externe Konditiounen of, mee och vill vu subjektive Meenungen. An zu Lëtzebuerg ass d’Meenung iwwert den ëffentlechen Transport, oder d’Motivatioun, fir en ze benotzen, vu viran zimlech negativ. De gratis ëffentlechen Transport géif wuel eng Partie Leit ëmmotivéieren – op d’mannst emol fir sech z’informéieren, op vläicht e Bus virun der  Hausdier fort fiert. Mee wien ass wirklech drun intresséiert, den ëffentlechen Transport mart anzebauen an e Liewensstil, wou et drëms geet, esou man wéi méiglech Schued um Planéit ze man? Wien ass bereet, eng eventuell méi laang oder manner komfortabel Rees a Kaaf ze huelen. Oder ass dat iren eng Experience, déi ee nët wëll widderhuelen? Wéi hat de Schwäizer Verkéiersexpär, de Professer Brändli, gesot . „Die Luxemburger haben kein Verkehrsproblem. Sie sind das Verkehrsproblem“.

RTL – 29.04.2010, 09:33 – Fir d’lescht aktualiséiert: 29.04.2010, 09:38

D’Adri van Westerop ass dout. Am Alter vun 52 Joer ass déi geléiert Chemie-Ingénieurin un engem Häerzleiden an u Longekriibs gestuerwen.

D’Adri van Westerop, Fra vum Raymond Aenderkerk a Mamm vum Joya, ass hei am Land bekannt ginn als éischten Ëmweltberoderin, wéi si fir den Oekofong geschafft huet.

Während 10 Joer Ëffentlechkeetsaarbecht, och um Radio, huet si sech fir e responsabelt Behuelen agesat, vum Akaf, iwwert gesond Ernährung an ökologescht Baue bis Ëmweltschutz an de Verwaltungen oder an de Supermarchéën. Zesumme mam heitege Minister Marco Schank huet si och 2 Bicher zu deem Thema verëffentlecht.

Di Verstuerwen wor awer och eng vun den dreiwende Kräften hannert der Oekofoire an huet matgehollef, TransFair-Minka ze grënnen, a sech ebe fir de fairen Handel zu Lëtzebuerg angesat.

Donieft wor d’Adri van Westerop an enger Abberzuel anere Projeten an Organisatiounen aktiv, déi hirer öko-sozialer Iwwerzeegung entsprach hunn: Si war Matbegrënnerin vun Akut a war bis zu Lescht engagéiert bei “Justice et Paix” a bei “Etika”.

Am Kader vum Projet “oppe Famill” vun der Croix-Rouge, fir Asilbewerber opzehuelen, hat si 2006 zesumme mat hirer Famill dem Samra aus Äthiopien fir annerhalleft Joer en neit Doheem ginn.

1999 ass d’Adri van Westerop an d’Direktioun vu Servior op d’Rhum gewiesselt.

Déi gebierteg Hollännerin, déi 1983 op Lëtzebuerg komm ass, ass 1999 fir d’éischt an de Conseil vu Betzder gewielt ginn. D’Adri van Westerop huet sech bei de Gréngen engagéiert a wor och Kandidatin op Lëschte fir d’Europa- a fir d’Chamberwahlen.

Si ass schonn e Mëttwoch gestuerwen. Eng Cérémonie d’adieu ass den Dënschdeg, 29. Dezember ëm 15 Auer an der Porkierch zu Rued/Syr.